歐國盃：大鱷玩角球執到笑
2012/06/15文:SAMVO肥叔

尋日同大家討論大賽特別投注項目，呢輪有個奇怪現象，部分博彩專家唔玩盤，反而專攻呢類特別投注項目，即使荷蘭大戰德國，佢哋主要都係玩角球同黃牌，一班大鱷喺走地睇準時機落注，命中率高到不得了，認真犀利！

事實上，大戶最強之處向來係計數，角球同黃牌同樣係有數得計，完全開正呢類大鱷嗰瓣，比起玩亞洲盤，佢哋玩呢類特別項目搶得仲狼仲狠，莊家基本上只有捱打。博彩市場千變萬化，嚟緊肥叔都會陸續留意呢個新興投注項目，幫大家緊貼市況。

講番今次推介，東道主烏克蘭再次出場，佢哋首戰對住瑞典，當時獲得一個2010年全歐洲博彩冠軍級人馬力撐，呢個克羅地亞博彩專家喺行內享負盛名，肥叔最初都唔信，最後都係放棄同佢打對台，結果烏克蘭成功贏埋，真係唔到你唔服！

烏克蘭搏殘 法國讓得起
不過，烏克蘭今次對住法國完全係兩回事，法國首戰賽和英格蘭，若想爭取晉級主動權，今場必思進取，論實力兩班波始終有距離，特別係烏克蘭陣中有好多老將，搏完一場未必可以保持水準，法軍小讓平半盤口合理，呢口上盤值得留意。

肥叔心水
法國 上盤、大

英格蘭 上盤