死亡B組最後一輪生死戰，葡萄牙於哈爾科夫米達列斯球場火併荷蘭，荷蘭今場必須淨勝兩球或以上才有出線希望，不過佢哋過去二十年從未贏過葡萄牙，加上內訌問題一發不可收拾，士氣跌至谷底，遇上同樣要爭出線嘅葡萄牙形勢唔樂觀，足智彩荷蘭客Ｗ由最初開盤1.93倍回飛至目前2.15倍，明顯被睇淡，平手盤波童捧葡軍。

荷蘭想出線八強，大前提係今場淨勝兩球或以上，再寄望宿敵德國擊敗丹麥，形勢雖然未絕望，但如果荷蘭可以話咁易贏波，又何需搞到如斯田地？事實上荷蘭分組賽兩連敗絕非偶然，中前場球員尹佩斯、洛賓各自為戰，中路無論起用馬菲臣或保馬夥拍希汀加都難予人信心，最慘係球員、領隊之間有心病，例如史奈達首場輸波後公開鬧隊友太個人主義，亨特拉爾、雲達華治、古積特又不滿被貶後備，洛賓上仗被調離場時，竟然行去另一邊而唔返回後備席，擺明發脾氣，可以睇到球隊內訌問題已經表面化，連最基本嘅鬥心、士氣都冇，試問又如何絕地大反擊？

就算唔計內憂外患，當弗嘅荷蘭想贏葡萄牙亦唔容易。翻查往績，荷蘭對上一次於國際賽擊敗葡萄牙係九一年，已經超過二十年未贏過對手，近八次碰頭，荷蘭只得三和五負。

雖然葡萄牙王牌前鋒基斯坦奴朗拿度今屆演出依然令人失望，不過球隊去仗能於完場前入波擊敗丹麥，取得寶貴三分，士氣、信心明顯遠勝荷蘭。

葡萄牙只要贏波，同時間丹麥未能擊敗德國，葡軍便可取得出線資格，目標明確、鬥志鮮明，「讓球主客和」受讓好抵玩，平手盤捧葡軍相信亦可坐和望贏。

兩軍為爭出線都會豁出去鬥攻，既然有C朗、拿尼、洛賓等快翼在陣，料有不少角球出現，特別項目角球大細投注，10.5球中位數宜捧大。