歐國盃：今晚繼續為西班牙怪叫
2012/06/18文:黃婉曼

上星期四晚我喺屋企睇波時，幾驚畀人投訴，因為我成晚一路睇一路怪叫！開波四分鐘費托就入波，即刻放心咗一半，我忍唔住大叫，我隊西班牙返晒嚟啦！跟住我就開始坐唔定，喺個廳行嚟行去，真係超緊張！下半場三分幾鐘，大衞施華又入一粒，個人都定番晒，再加埋費托梅開二度，仲有後備入嚟都有「士哥」嘅法比加斯，咁先係世界冠軍o架嘛！雖然今仗對同得4分、至今表現不俗嘅克羅地亞，但係如果打到上場嘅水準，西班牙要出線一定冇問題。

睇得投入一齊大叫
有朋友話，都唔明點解你哋啲女仔睇波係咪都怪叫，我雖然唔係女權主義者，但我有時真係覺得你哋啲男生係對女仔有偏見，男仔睇波嗰陣一樣會叫o架，入到波會叫，入唔到波又叫，唔係自己捧嗰隊入波、犯規都一樣會叫！其實無論係大叫定怪叫，都係對場波投入嘅表現，大眾球迷肉緊啲一齊叫，四年一次嘛！今晚西班牙又出戰，拜託我附近啲鄰居體諒吓，如果叫得太大聲千祈唔好投訴我。