歐國盃：意大利落飛炒得起
2012/06/18文:巨高

歐洲國家盃C組最後一輪賽事，其中一場為意大利對愛爾蘭。後者兩賽皆北已提早畢業，今場只係例行公事。相反，意大利一定要取勝才有晉級希望，兩支球隊喺鬥志方面各走兩極，足智彩主W初盤由1.63倍下調至昨日1.31倍，意大利今場應可輕鬆擊敗對手，「讓球主勝」值得睇好。

好多球迷都知今場意大利贏波都未必出線，因同組「西克」兩隊開出二比二或較高入球和局，意大利今場贏幾多球都會出局。但無論點計數都好，意大利喺最後一場分組賽都要做好自己本分，成功擊敗愛爾蘭，唔贏就乜都唔使計。出線形勢不利令意大利今場會踢得好積極，一於攻到愛爾蘭慌。就算最終被踢出局，揸住不敗賽績完成今屆歐國盃都對得住鄉紳父老。

意大利可動用嘅人腳唔多，相信基亞連尼、卡斯辛奴及派路等骨幹都會正選上陣。賽前藍軍領隊柏蘭迪利話唔會變陣，亦即表明迪羅斯會繼續擔當後場自由人角色，剛啱康復嘅巴沙利會先列後備。

愛爾蘭兩戰兩敗提早出局，擺到明佢哋的確唔夠打歐國盃。巨高大膽講句，愛爾蘭就算打真軍都唔夠意大利，更何況愛爾蘭已經出局，爭勝鬥志難免會受影響。另外，愛爾蘭領隊查帕東尼為意大利人，2000-2004年間亦曾執教過意大利，話唔定今場會向祖國伸出援手呢！

卡斯辛奴踢唔足全場
特別項目方面，意大利今場定必搶攻，踢法會令角球數字偏高，超出九個都唔出奇。至於卡斯辛奴因為體力不足，所以頭兩場分組賽都被領隊柏蘭迪利換息。今場卡斯辛奴被換出賠率有3.1倍，極之抵玩。

後防破壞王 奧沙
効力：新特蘭

愛爾蘭雖然兩仗共失七球，但後衞奧沙演出仍值得一讚，佢喺防線一夫當關，多次瓦解對手攻勢，如果唔係有奧沙在陣，愛爾蘭可能輸得仲多。愛爾蘭即使已出局，但呢位前紅魔球員一向鬥志頑強，隨時破壞意大利贏波好夢。

擅射核心 派路
効力：祖雲達斯

呢位33歲老將無疑係意大利核心人物，今屆兩戰盡顯大師級功架，首仗妙傳迪拿達利建功，上仗直接主射罰球入網。意軍今仗非勝不可情況下，派路策劃進攻嘅角色就更重要，球隊今屆食粥食飯旨意晒佢。

兩軍對賽往績
日期 賽事 賽果

08/06/2011 熱身賽* 愛爾蘭 2:0(1:0) 意大利

10/10/2009 世盃外 愛爾蘭 2:2(1:1) 意大利

01/04/2009 世盃外 意大利 1:1(1:0) 愛爾蘭

17/08/2005 熱身賽 愛爾蘭 1:2(1:2) 意大利

18/06/1994 世界盃* 意大利 0:1(0:1) 愛爾蘭

註：*為中立場