歐國盃：金睛火眼都要睇實法國
2012/06/19文:江卓儀

呢一排生活非常充實，除咗返工，其餘時間都全情投入波來波往嘅世界，要為沙排節目做評述、又要為歐國盃做直播節目，仲因為偷偷睇歐國盃練出金睛火眼。最初我只係計劃就啱roster睇法國同意大利嘅比賽，但打完首輪之後，好多隊都有估唔到嘅賽果，令我好多個唔使返工嘅晚上，都不由自主咁走咗去睇波。

今晚就會知我支持嘅法國可唔可以打入8強，當日做「死亡B組」pre-show節目時，Keyman話C朗未試過喺國際賽連續三場冇波入，今場一定有，咁都畀佢講中喎！休息時候當然即刻問吓佢我隊法國掂唔掂，佢話法國今場對住肯定出局嘅瑞典和都得，叫我放心。我呢啲dead hard Fans梗話法國點會和呀，最少贏兩粒！

除此之外，我估英格蘭會同法國一齊出線，我睇新聞話上場瑞典追番兩球，極可能係因為有人洩漏英軍排陣同戰術畀瑞典知，呢單料係咪真我就唔理，不過今場朗尼可以上陣，仲有韋碧克、尼史葛、禾確特、謝拉特，再畀人洩漏軍情都應該過到關。

中國女排咪錯過
咪以為我全情投入足球世界，就忽略排球呀！我一樣有緊貼中國女排，佢哋啱啱喺世界女排大獎賽佛山站三戰全勝，繼澳門站之後再度封后，嚟緊星期五開始，佢哋就會喺中國漯河站對古巴、波多黎各同巴西，好彩完全同歐國盃比賽時間冇撞期，我當然繼續兩邊支持，睇完女排睇足球啦！