歐國盃：法國瑞典鬥搶士哥
2012/06/19文:走肖
刀疤火併喪攻陣
烏克蘭王牌疑似話別，法國呢邊就有新王登基！「刀疤球王」列貝利喺頭2場分組賽表現出色，已經被球迷視為繼柏天尼同施丹後法國嘅新領袖，今晚D組壓軸戰鬥瑞典，又係佢「騷哥利」爭取士哥嘅良機。撞啱瑞典今屆以全新攻擊型打法出現，搞到已經連續11場歐國盃賽事開大，家陣出埋局冇晒包袱，谷到爆粗嘅伊巴謙莫域肯定會回復「真我」入波，玩1.78倍大最穩陣。

瑞典歐國盃連開11次大
無論係「黑白雙連」達連同布連時代，抑或由軒歷拿臣領軍，瑞典都係硬橋硬馬高效率球隊，守得穩唔在講，即使全場處下風，簡單幾腳傳送或者死球攻勢，就可以攞對手命，代表作當然係02年世盃分組賽由安達斯史雲遜以1:1打和阿根廷逼對方出局。所以依家嘅瑞典，真係令我好陌生，攻呀攻好似睇緊《足球小將》咁，作為球迷當然歡迎，但就好睇唔好食提早出局囉！

瑞典連輸2場玩完，個人覺得係教頭咸雲領軍太進取，唔多識計數，每場都想贏波。睇番外圍賽，其實瑞典頭場以2:0贏匈牙利後，連續9場開入球大，加埋分組賽連開兩場入球騷，即係話瑞典已經連續11場歐國盃賽事開大益街坊，家陣篤定出局，伊巴謙莫域仲會扮10號分波咩？梗係自己射多幾腳啦！

法國馬維拿傷愈踢正選
或者瑞典同法國對攻隨時3連敗執包袱，但伊巴謙上場谷到失控當眾爆粗鬧赫特，證明佢好有火，對住連法國教頭白蘭斯都承認唔穩陣嘅防線，大把世界。加上中堅莊拿斯奧臣日前返國陪老婆生BB，就算趕得切歸隊都影響備戰，睇怕入得又失得。法國呢場贏或和都出線，而且有中場馬維拿傷愈可能踢番正選，前線又有個弗到爆嘅列貝利，既然佢已經畀球迷封為法國隊新領袖，期望咁大今場當然唔會揸流攤，加上佢個拍檔賓施馬又未開齋，落到場實會落力爭士哥啦！

D組各隊出線條件
法　　國：贏或和都肯定出線，輸波嘅話，就要視乎烏克蘭對英格蘭嘅賽果。

英格蘭：贏或和都肯定出線，輸波嘅話，要寄望瑞典贏法國，再同法國計得失球定斷。

烏克蘭：必須贏波先可出線。

瑞　　典：篤定出局。

橫數千軍
 瑞典近11次交手不勝

‧近43年11場同法國交手都未贏過。

‧連今屆在內，最近5次打入決賽周，共14場分組賽得4勝4和6負，7次開大，7次開細。

‧伊巴謙莫域連續4場入波後，上仗未能取得入球。

‧歷來3次喺歐國盃對法國，只得2和1負。

‧唯一一次喺正式比賽贏法國，係1969年10月舉行嘅世界盃外圍賽。

 法國23場不敗16勝

‧近23場不敗，得16勝7和。

‧連今屆在內，最近6屆決賽周，共17場分組賽得6勝6和5負，10次開大，7次開細。

‧門將洛里斯係唯一踢足所有外圍賽嘅法國球員，10次把關有6次未有失球。

‧領隊白蘭斯曾以法國國腳身份6戰瑞典，獲得2勝4和。

‧近6次對賽得3勝3和，其中4場開細