歐國盃：英軍氣吞烏克蘭
2012/06/19文:蘇豪
逆境反勝 戰意如虹
歐國盃D組最後一輪賽事，東道主烏克蘭迎戰英格蘭，喺鶴臣帶領下，英軍改行平實路線，上場將士用命克服逆境反勝瑞典，已為眾將打下強心針，現時班兵士氣高漲，今場有埋朗尼復出如虎添翼，根本冇必要死守求一分，勢將反客為主，讓平半捧上盤！

英格蘭上次鬥瑞典戰情峰迴路轉，換邊後防線兩度發夢失守落後1比2，幸得後備兵禾確特幫手扳平，跟手再由射手韋碧克後腳建功奠勝。英軍以往打親大賽雷聲大、雨點少，今屆改以鶴臣領軍，早被批死唔掂，球員壓力大減，輕裝上陣反而仲好，大軍頭兩場踢得唔悅目，但交到成績，現時有四分在手，今戰再添一分就可出線。

朗尼回歸火力大增
英格蘭亦有不利因素，經歷傷兵退隊潮後損失林柏特及加利卡希爾等主將，中後場陣容並非最強。另外，大軍以波蘭為大本營，場場都要搭飛機去比賽，幾日內數度往返烏、波兩國，舟車勞頓，體力受損。不過，從英軍上場對瑞典士哥後場面所見，眾將攬頭攬頸老友鬼鬼，隊內氣氛甚佳，今場仲有射手朗尼回歸，進攻更有把握。

舒夫真高或缺陣
烏克蘭首戰反勝瑞典盡顯鬥心，但上場對法國走晒樣，隊中老將多，班球員換邊後莫氣，完全跟唔上對手速度，落後嗰陣亦谷唔起，已成強弩之末。賽前消息指隊中靈魂人物舒夫真高有傷未必出得，老實講，以烏軍現時情況，就算有冇「軍刀」都差唔遠，皆因球隊中場創造力不足，對前線球員支援不足，今戰想出線一定要贏，於焗攻情況下仲易輸，絕對信唔過！