哥連泰斯主場歎細界
2012/06/20文:法達斯維
領先山度士一粒唔同你急!
南美自由盃明早上演四強次回合，巴甲內訌哥連泰斯主場鬥山度士！哥連泰斯今屆賽事未嘗一敗，加上首回合小勝一球，今仗必定會踢得保守。山度士近期鋒力疲弱兼冇晒火氣，今場捧細。

呢場巴甲內訌，首回合哥連泰斯憑馬斯奧艾馬臣先拔頭籌，作客贏山度士一粒取得領先優勢，今返主場只要保持不敗，便可進身決賽。哥連泰斯今屆由分組賽起計，一共踢咗十一場自由盃賽事未輸過，當中五場主場全勝兼冇失波，表現四平八穩，不過考慮到佢哋今場和波都收貨，首要目標應該係先求不失，要讓波唔多抵玩。

尼馬踢完太公波謝晒
山度士上場聯賽收起尼馬、甘素、艾蘭奴等主力，擺明留力搏今仗，不過尼馬經過早前替巴西國家隊踢咗幾場熱身賽，明顯出現疲態。而且山度士上一圈對沙士菲，作客都攞唔到入球，與其捧邊隊贏波，捧細仲划算。

今場四強戰如果兩回合總比數打和，將計算作客入球優惠，若未分勝負則直接以互射十二碼決勝，不設加時