智大上盤有保證
2012/06/21
小保加上場聯賽輸畀沙蘭迪兵工廠，爭標渺茫，列基美冇晒心機。
主場夠惡博翻身
周五早上南美自由盃四強次回合，智利大學主場迎戰阿根廷班霸小保加。小保加剛喺聯賽爭標關鍵戰派出主力情況下落敗，體力、士氣均受挫，而且佢哋今場就算輸一粒都晉級，戰意不及非勝不可嘅主隊。智利大學近十場主場九勝一和，惡氣十足，小讓平半捧上盤。



首回合小保加憑主場之利勝2比0，晉級形勢一片大好，佢哋今季兼顧聯賽、自由盃兩條戰線一直都有好表現，可惜上周末聯賽火併爭標勁敵沙蘭迪兵工廠卻告輸波收場，目前阿甲僅餘一輪秩序，小保加落後兵工廠及堤格雷兩分排第三，爭標機會渺茫，所以嚴格啲講，呢場輸波幾乎已將佢哋整季努力付諸流水，如今惟有集中火力應付自由盃。

小保加聯賽爭標洩氣
由於上場聯賽關乎爭標前途，所以小保加教練法爾斯干尼未有刻意留力，中場靈魂列基美、後防主將舒希艾維、中前場文奴及白蘭迪等主力都踢足全場，體力或多或少受影響。

智利大學主場演出一向有保證，連盃賽在內近十場主場取得九勝一和，單計今屆自由盃五場主場亦有四勝一和佳績。唔計小保加和波或輸一粒都可以晉級，萬一攞到作客入球，就算淨輸兩粒都未驚過，所以講求勝決心肯定主隊贏晒，以主隊咁彪炳嘅主場數據，小讓平半實在好抵玩