歐國盃：「西法戰」12碼定輸贏？
2012/06/23文:梁穎瑜

呢排自覺做咗歐洲人，由法網開始到歐國盃都跟歐洲時間返工同休息，日夜顛倒。近排仲發現一個好笑現象，就係每逢搭車都見到多咗好多人「釣魚」。恰眼瞓有乜咁好笑？好笑在無論係邊段時間、搭緊乜嘢車都係咁喎。好彩我因為工作關係，睇完波就可以返歸瞓到第二日返工，呢個時候真係覺得做體育節目主持都幾好！

不過，歐國盃戲碼強勁當然要繼續力撐，依家都已經打到淘汰賽，今晚就會上演8強戰第三場，亦可以話係矚目大戰——西班牙對法國。兩支都係賽前被譽為有機會問鼎冠軍嘅球隊，尤其係世界一哥西班牙，但Ricky、何輝佢哋都話兩隊上場有啲失色，鬥牛勇士打完上場後冇得休息仲要加操；法國球員就喺更衣室鬧交，仲好似話列貝利同拿斯尼受傷無跟操喎！不過，我就覺得兩隊都係有實力，估計法定時間分唔到勝負，要射12碼。

克勤忠仔默契一流
其實，我都唔捨得歐國盃，四年先一次，下次已經係2016年，就算我再有機會做主持，都未必係呢班人腳，不過今次合作得好開心。平時工作都係我哋一班評述員，好少跨台同101台或102台主持合作，喺其他人身上學到做節目或者做主持嘅秘訣，仲見到克勤同忠仔知道乜嘢叫做Friend過打Band同默契，原來男仔嘅友情都可以去到呢個位。