歐國盃：賽事公平公正 帶旺投注市場
2012/06/23文:Samvo肥叔  

今屆歐國盃喺東歐舉行，初時以為會有好多蠱惑嘢，但開賽之後，情況比預期更公平、公正、公開，畢竟係國際著名大賽，有好多人睇住，想出蠱惑亦唔容易。投注者愈來愈放心，投注額有望打破上屆數字，特別係英格蘭好受亞洲區人士歡迎，如果繼續晉級，有助帶動投注資金上升。

由於英超多人睇，亞洲區球迷對英格蘭亦比較熟悉，有英軍嘅賽事，投注額往往較多，最多一場係英格蘭對瑞典，呢場比賽入波多，戰情變化大，吸引大量走地注額。當然亦要多得有關當局全力維持比賽公平性，有利刺激投注，大戶亦得心應手，斬獲當相豐厚。

法軍有級數唔怕西班牙
以前晚嗰場八強捷克對葡萄牙為例，一開波大戶已追細盤及下盤，中段有小量資金改捧大及上盤，比賽末段已重錘再追細盤及下盤，順利命中，盈利理想。亞洲盤及大細盤比較易捉路，反而角球等特別投注項目，比較難玩亦唔公道，呢方面投注數字唔多。

今晚八強西班牙讓法國半一，未免讓得太多，法國上仗輸畀瑞典，有留力之嫌，以佢哋級數唔怕任何球隊，下盤可留意。