歐國盃：「女人仔」認真學睇波
2012/06/24文:黃婉曼

呢一排嘅生活過得超級充實，除咗繼續《撳快錢》，近排仲開始係now芒果台做《操控音樂》，半夜仲要追睇歐國盃，真係想休息多陣都唔得！

以往我偶爾都會睇波，但今年就好似特別投入咁，因為公司好多同事都瞓身去做歐國盃。今年我無份跨台參與，但係返到廠預備節目時，好幾次見到Keyman好認真咁為歐國盃節目做功課，我就會埋去八卦吓，Keyman通常都會同我講吓當晚場波，問我點睇， 完我講就會解釋女仔就咁睇，佢哋男人睇呢隊波就咁睇，仲會教我欣賞球隊嘅戰術、點嘅入球先係世界波咁。

以前我成日覺得男士們同女仔講波都係敷衍吓就算，但經過幾次同Keyman傾波之後，我發覺其實咩事都只係人觀點與角度問題，好多男士其實都尊重我哋呢啲女fans o架。

情意結作祟撐英軍
話咁快歐國盃八強戰今晚就打到最後一輪，香港最多fans嘅英格蘭惡鬥意大利。其實，今屆我除咗支持西班牙，同埋兩個我去過嘅主辦國，仲有就係英格蘭，呢啲都係情意結嚟，可能由細最多機會接觸嘅都係英國波啩？上場復出嘅朗尼雖然未喺最佳狀態，但都畀佢入到波助英軍晉級，今晚佢應該會打得更好。不過佢哋對住有「鋼門」保方嘅意大利，朗尼、韋碧克佢哋唔知可唔可以射破佢十指關？

雖然喺公司無份做歐國盃節目，但今年我真係參與好多嘢，除咗睇波，我仲有喺《東方波經》寫專欄，有時去街買嘢都有人同我講話「Icy，我有睇你喺東方寫啲嘢o架！」，要同大家講句，多謝大家支持！