歐國盃：Ｃ朗細擋蠻牛
2012/06/27文:巨高
今晚歐洲國家盃首場4強大戰，由兩個伊比利亞半島國家葡萄牙及西班牙爭奪決賽席位。雙方過往已有多次交手紀錄，而且部分球員更是球會隊友，例如C朗就要面對皇馬隊友及一眾巴塞宿敵，可以講「雙牙」彼此熟晒路，今仗料會互相牽制，唔容易大手交易，入球睇嚟又係一個起兩個止，捧細盤最好不過。

艾美達衝鋒冇態
葡萄牙於今屆歐國盃愈踢愈好，特別係隊長基斯坦奴朗拿度，近兩場比賽取得三個入球。不過C朗弗唔代表球隊攻力強，就以8強對捷克為例，C朗連番攻門都只係取得一個入球咁大把，而其他隊友亦冇太多攻門鏡頭出現。須知道捷克實力唔算強，惟葡萄牙久攻之下僅以一球險勝，證明葡軍整體入球能力只屬一般。

今場葡萄牙正選射手普斯迪加仍未傷愈，今場極有可能以曉高艾美達頂替，後者喺歐國盃上陣時間不多，比賽心理及狀態都未必及普斯迪加咁好，要攻破西班牙防線有難度。

西班牙搓多過射
西班牙奉行控制型足球，球員互相送傳二至三十次都唔會打入對方禁區，一味控球在腳靜待機會，踢法缺乏積極性。難怪8強贏法國一役，被球迷選為今屆歐國盃其中一場最沉悶比賽。上仗梅開二度嘅沙比阿朗素及領隊迪保斯基賽前更講到明唔會改變踢法，一於「悶」中求勝。再講，西班牙未必會派前鋒落場，迪保斯基隨時又用中場法比加斯擔任假前鋒角色。陣式編排保守，「鬥牛勇士」入球應唔會多。

葡萄牙
★C朗剛於8強對捷克一箭定江山，令他在歐國盃決賽周的入球數字累積達6球，已追平前輩紐奴高美斯

★C朗在今屆賽事取得3球，使他於國際賽累積達35個士哥，超越了名宿費高，成為葡國史上第3號射手，僅次於保列達和尤西比奧

★普斯迪加與C朗均在三屆歐國盃決賽周取得入球，與奇連士文、紐奴高美斯、亨利、伊巴謙莫域、史米沙睇齊

★葡萄牙今屆曾6次攻門中柱，成為歐國盃決賽周歷來單屆中柱最多的球隊，其中C朗一人包辦了4次

西班牙
★自2010年南非世盃決賽周首仗不敵瑞士後，西班牙在之後的18場正式賽事未輸過，不過這段期間的14場熱身賽輸4場，其中以0比4輸畀葡萄牙

★法比加斯在歐國盃決賽周後備上陣次數達6次，只比前荷蘭中場雲達少一次

★門將卡斯拿斯保持了8場大賽淘汰賽的清白之身，上次於淘汰賽失波已是06年世盃16強輸畀法國1比3

★沙維於歐國盃歷來造出734次的成功傳波，成為歐國盃傳球之王，其中對愛爾蘭之役，他就作出133次的單場個人紀錄

★自去年11月熱身賽輸畀英格蘭後，西班牙至今保持9場不敗