歐國盃：煮德國鹹豬手撐意大利
2012/06/28文:鄧伊玲

今屆歐國盃我嘅心情起伏好大，又或者可以用忐忑嚟形容，我鍾意三支球隊英格蘭、西班牙同意大利都入到8強，但係最鍾意嘅英格蘭又偏偏畀意大利轟出局，無緣爭標，以依家形勢嚟睇，西班牙又好有機會喺決賽同意大利爭冠軍，哎呀！唔知點算好。Keyman佢哋就話我應該開心先啱，因為西班牙同意大利有機會喺決賽打對台，如果真係咁，我支持嘅佢哋就會成為今屆嘅冠亞軍，所以我點都係應該開心吖。咁又係喎！佢哋兩隊邊隊捧盃，都會成為「歐洲最強」，咁我仲有咩好忐忑喎！

意軍識攻 德驕兵必敗
今晚就會打德國對意大利嘅4強戰，有報道話德軍冇練12碼戰術，好有信心覺得自己可以喺90分鐘內搞掂我隊意大利。由細到大，阿媽都教我驕兵必敗，加上要射穿保方十指關談何容易，同埋上場對英軍意大利都大打進攻足球，今場佢哋都唔會死守，所以我覺得德軍今場會嘗到敗仗嘅滋味。

之前喺節目度撞到Sonia，都講過吓大家支持邊隊，佢除咗法國，就係意大利，尋日睇到佢喺呢個專欄都寫，話期待決賽係意大利對西班牙，開心死，有人同我同聲同氣，今晚好唔好另外煮隻德國鹹豬手同佢兩個人一路食一路撐意大利呢？