歐國盃：德意鬥轟玩舖大
2012/06/28文:蘇斯黑柴
歐國盃Big4大戰重頭戲，德意雙雄高手過招，好多人形容今場為攻防戰，不過黑柴唔同睇法，意大利經過領隊柏蘭迪利改造後踢法已今非昔比，今場有足夠決心同勇氣與德軍對攻，入球大有2.29倍超賠率係投注首選。

意大利改革踢出激情
「藍戰士」意大利上仗只靠互射12碼淘汰英格蘭，不過喺踢法上明顯比以往主動，今屆經過頭四場比賽，意軍87次射門係四強中射門次數最多嘅一隊，上仗若非法定時間兩度中柱，英軍根本捱唔到射12碼。意軍中場派路喺今屆賽事大放異彩，除咗罰球百步穿楊外，亦多次為前線送出致命傳球，馬治斯奧、迪羅斯、蒙杜利禾同連仗後備入替都有精彩演出嘅迪亞文迪亦充滿進攻意識，足以畀到鋒將巴洛迪利、卡斯辛奴同迪拿達利有力支援。門將保方就形容呢隊係佢効力以來最富激情同創造力嘅意軍。

意軍目前士氣高昂，對娛樂性充滿追求，包括柏蘭迪利同派路都先後嘲諷英格蘭龜縮踢法，相信今仗唔會主守，何況佢哋防線連仗都有甩漏，能夠殺入四強，門將保方屢救險球居功至偉，今仗唔會坐以待斃。

德國戰術千變萬化
德國隊至今四戰全勝未逢敵手，共入九球係四強最多一隊，而且入球數字一仗比一仗多，領隊勒夫上仗試用高路斯同馬高列奧斯擔正亦取得滿意效果，球隊前線板斧同變化甚多，勒夫賽前仲出口術，話會繼續變陣，隨時會有令人意想不到嘅球員擔正，足以令柏蘭迪利諗到頭爆，不過德軍防線亦唔可靠，守將謝路美保定最唔穩陣，兩名防中基迪拉經常谷得太前，舒韋恩史迪加帶傷踢未在最佳狀態，未能成為防線有力屏障。

揀埋「和主」「客主」
今場係高手過招，雙方都唔會保守，喺比賽頭七十分鐘應該旗鼓相當，不過德軍年齡結構更理想，後備兵源同實力更強，賽前休息同備戰時間更足，估計末段可憑後勁制勝。黑柴相信德軍可以喺九十分鐘內小勝對手，但意軍亦會取得入球，入球大係投注重心，想要好分頭可以兼顧德國「讓球和」甚至半全場「和主」同「客主」。

德國
★上仗大勝希臘後，德國於正式比賽造出15連勝的新紀錄，打破之前西班牙、法國及荷蘭共同保持的連勝14仗舊紀錄

★德國於過去14仗中，只有4場保住清白之身

★德國近20場賽事全部有波入，打破該隊於1989-91年所保持的連續19場有士哥的舊績

★主帥勒夫已帶領德軍打了84場賽事，排史上第4位，當中贏咗57場，僅輸12仗，是勝率最高的德國領隊

意大利
★右閘馬治奧因累積兩面黃牌，今仗需要停賽

★派路上仗8強對英格蘭之役，個人作出146次傳波，其中有117次是成功傳送

★意大利於過去七次於歐國盃的加時賽事，從未試過入波

★自2010年南非世盃後上任，柏蘭迪利帶領意軍於正式比賽中未輸過，取得9勝5和的成績