歐國盃：熱門客變晒大戶點心
2012/06/30文:Samvo肥叔

歐洲國家盃四強戰生意好好，經過連場正路賽果後，準決賽終於有啲冷味，兩場都開下盤，散客熱捧球隊西班牙同德國齊齊輸盤，佢哋變晒大戶點心。去到呢個階段，各國水平非常接近，個別球員發揮同領隊部署足以左右勝負，玩上盤點計都冇着數。

首場四強「雙牙戰」葡萄牙發揮一絕，但普羅球迷盲目捧西班牙，即使葡軍踢得較好仍然迷信西班牙狂追大盤同上盤，結果梗係輸晒啦。另一場散客又係信晒德國，大戶初盤吸納意大利下盤，意軍領先後再掃下盤，贏到開巷。計人腳德國一定贏意大利，甚至高過西班牙，但意軍部署好，球員發揮得淋漓盡致，幫班專業博彩者贏到盡。

意西再碰頭 盤口唔同晒
話咁快就去到決賽，西班牙同意大利再次碰頭，兩隊喺分組賽交手時，西班牙讓到半一，當時有部分莊家甚至開到一球，意大利下盤超低水，結果雙方打成平手。兩隊決賽再戰，盤口已經唔同晒，外地莊家普遍開出西班牙讓平半至半球，以波論波，西班牙確係高啲，讓平半值博，但若果讓到半球就有啲保留，畢竟意大利家陣都好弗。

另外，有部分博彩公司開出西班牙讓半一盤口，決賽場合開個咁嘅盤，明顯焗人玩意大利，肥叔賭波一向注重水位多過盤口，皆因長期買低水點計都蝕底。