歐國盃：意軍＋１顛覆狂牛霸權
2012/07/01文:渡邊年

歐國盃決賽今晚於烏克蘭爆發，衞冕嘅西班牙同意大利爭奪最高榮譽。近年西班牙呼風喚雨，成績及表現都值得尊重，不過球迷亦開始厭倦呢種機械式踢法，「地上最強」漸漸淪為「足球霸權」，係時候輪到意大利血性足球抬頭！意軍擁有「腦殘」巴洛迪利及「壞孩子」卡斯辛奴，娛樂性及效率並重，事實上西班牙過去七次大賽未試過於法定時間內擊敗意大利，意軍受讓，「讓球客勝」值捧。

講波之前先要申報利益，渡邊年喺8強前買咗意大利同法國攞冠軍，投注時賠率分別有12同13倍。老實講，當時只係一廂情願想兩隊可以打破壟斷，雖然依家意軍奪冠只得2.35倍，但佢哋喺晉級過程中證明咗身價及實力，演出有說服力，仍具投注價值。至於法定時間嘅投注，渡邊年會建議大家玩「讓球客勝」，再補少少客Ｗ。

支持點1︰飢渴感
今仗揀意大利有三個支持點，分別係實際表現、歷史因素及球壇期望。先講實際表現，兩隊都殺到入決賽，乜嘢460陣式、射門次數、控球指數等意義已經不大，呢一刻雙方實力已經冇高低可言。所謂表現係指求勝心態，相對嚟講，西班牙球員飢渴感冇意軍咁大，而且「鬥牛國」整體表現只可以用「恰如其分」嚟形容，意大利其實一仗比一仗進步，甚至有「驚喜」。

支持點2︰格食格
第二係歷史因素，連同今屆首輪分組賽打和1比1，意大利過去七次於大賽遇上西班牙，從未喺法定時間輸過，呢個格食格嘅往績，「藍衫軍」喺4強戰對德國已經「應驗」咗，證明大賽對賽數據確係用得着。

支持點3︰輪流轉
最後係球壇期望，渡邊年不得不承認，西班牙極具效率嘅控球踢法，從足球戰術上確係100分，不過當8強西班牙淘汰法國後，facebook被朋友洗版，狂插「鬥牛國」不思進取，悶戰一場接一場，機械式嘅贏波叫人發悶。

相反，意大利中場派路對克羅地亞射入靚爆罰球，前鋒巴洛迪利4強梅開二度，都贏盡掌聲，球迷都感受到足球血性回歸。06年意大利登上世界之巔，08年被西班牙終結王朝，2012年嘅今日，意大利可以憑着今場決賽，重整足球秩序，踢走「足球霸權」。

西班牙
★西班牙是繼70年代西德之後，第2支連續3個大賽都能殺入決賽的球隊

★法比加斯在歐國盃決賽周後備上陣次數達7次，追平了荷蘭名宿雲達的紀錄

★門將卡斯拿斯保持了9場大賽淘汰賽的清白之身，而這佳績始於08年歐國盃8強戰，當時的對手正係意大利

★上仗對葡萄牙係卡斯拿斯第10次以隊長身份出戰歐國盃決賽周，打破了迪甘斯、古列治、馬甸尼共同保持的9次紀錄

★西班牙與意大利在歐國盃決賽周歷來對賽4次，竟錄得3和1負未贏過，而鬥牛國唯一的入波，就係今屆分組賽對壘時法比加斯取得

意大利
★自2010年南非世盃後上任，柏蘭迪利帶領意軍於正式比賽中未輸過，取得10勝5和的佳績

★意大利於過去七次於歐國盃的加時賽事，從未試過入波

★上仗對德國連入兩球的巴洛迪利，是第2位在歐國盃決賽周一場中梅開二度的意軍，上一位是96年對俄羅斯時省兩粒的卡沙拉基

★巴洛迪利成為首位於單屆歐國盃決賽周取得3球的意軍，與卡斯辛奴並列歐國盃決賽周入波最多的意大利球員

★連同世盃及歐國盃決賽周，意大利對戰西班牙從未輸過，一共取得3勝4和