阿辛卡奧復出撐彭美拉斯響頭炮
2012/07/05文:朱楓

朝巴西盃爆發決賽首回合，由彭美拉斯主場火併哥列迪巴。彭美拉斯今仗有「重炮手」阿辛卡奧復出，加上門將般奴哥迪斯賽前獲名將教路，朱楓睇好「綠軍」可打響頭炮，順便報埋上屆一敗之仇，捧1.82倍主W！

雖然已經12年冇贏過大賽冠軍，但由於球隊近年人腳成日轉，賽前外間都對彭美拉斯今場爭勝決心有懷疑，不過門將般奴哥迪斯就話全隊球員其實都知「綠軍」係巴甲最成功球會之一，好希望今年幫球隊贏巴西盃，繼而出席下屆自由盃，仲話巴高斯同艾達拔圖路文兩名今季先加盟嘅外援，經過早前4強對甘美奧獲球迷熱情支持後，都意識到今屆巴西盃對球隊有幾重要，相信佢哋兩個今場會為球迷而戰。

哥列迪巴作客腳軟
其實又難怪般奴哥迪斯咁有信心，事關佢賽前爆料，話自己獲球隊名宿馬高斯教路，加上「重炮手」阿辛卡奧同右閘艾杜亞都已傷愈候命，睇落應可先下一城，報番上屆巴西盃8強首回合，作客慘敗畀哥列迪巴0:6之仇。

綽號「光榮」嘅哥列迪巴，近年靠一班失意軍人愈踢愈好，繼上年殺入巴西盃決賽屈居亞軍後，今年再又一次踢呢項賽事嘅決賽，獲分配嘅4千張波飛，更喺官網開售後不足1小時賣清，不過哥列迪巴一向係作客蟲，已錄得6場不勝，呢場想全身而退睇落唔易！

巴西盃賽制：
決賽採主客兩回合淘汰制，今輪為首回合，若兩回合總比數賽和，採作客入球優惠，若作客入球數目相同，則在次回合90分鐘後互射12碼分勝負。