希爾星堡「+1」信心爆登
2012/07/09文:ComboKing
今晚屬於北歐波嘅世界，阿King重點推介瑞典超「雙堡」大戰，哥登堡主場對希爾星堡。哥登堡近年戰績持續低迷，今季更捲入降班漩渦，球隊信心盡失，今仗竟然要讓上季冠軍希爾星堡未免過火，一於撐「讓球客勝」。

哥登堡雖然同馬模被譽為瑞典兩大傳統勁旅，但哥軍近年風光不在，過去兩季僅得第七，今季仲衰竟然要為護級而戰。聯賽上輪重開後，哥登堡又輸波，證明球隊並冇趁休戰期間好好檢討，佢哋已連續六場聯賽未贏過，積弱已久，短期內難翻身。

奧雷布洛食住個「細」
反觀希爾星堡上仗取得大勝，展示爭取衞冕嘅強大決心，而且希軍近年食住哥登堡，雙方近四次聯賽交手，希爾星堡取得三勝一和優勢，今仗受讓之下，「讓球客勝」仲有1.78倍，實在非常抵玩。

另一場瑞典超，奧雷布洛主場對馬模，奧軍換帥後上仗即贏波，可見「新帥效應」絕對唔可以睇小，加上有地利之助，馬模要咬入佢哋有難度，捧入球細。挪超費德列斯達主場對利尼史特朗，利軍近期聯賽及盃賽雙線作戰，近三仗輸兩場，球員應付唔掂頻繁賽程，要費德列斯達主勝。