連菲特操弗撲擊B36
2012/07/10文:法達斯維
今晚有歐聯、歐霸外圍賽首圈次回合賽事，北愛榜首雙雄連菲特及樸達丹分途出擊，連菲特作客法羅群島球隊B36拖錫雲，而樸達丹則主場迎戰馬其頓嘅舒肯迪捷，以波論波，北愛雙雄實力稍勝對手，預計贏波晉級冇難度，簡單要晒佢哋單W啱啱好。

大家可能會問，點解歐聯同歐霸咁快開波？其實依家只係兩項賽事嘅外圍賽，外圍賽總共分為三圈，今輪係第一圈，踢完三圈後仲有附加賽，全部採主客兩回合，換句話講如果由第一圈開始能夠殺入九月開打嘅分組賽，一共要應付八場賽事，少啲韌力都唔得。由於歐洲足協以各會員國嘅排名系數編配名額及從哪個階段開始參賽，因此首圈會出現一些法羅群島、北愛、馬其頓、瑞典等系數較低嘅球隊。

連菲特係歐洲賽常客
講番今晚賽事，北愛班霸連菲特係歐洲賽常客，經驗豐富，上仗畀法羅群島球隊B36拖錫雲悶和，與其說對手防守穩固，不如話連菲特開操冇耐狀態未弗，以致於主場久攻不下。好彩首回合○比○唔算係壞戰果，同埋經過上仗熱身後，預計佢哋演出會有所提升，加上客W賠率偏熱，證明對連菲特有信心，可留意埋個入球大。

樸達丹返主場搶W
另一支北愛球隊樸達丹一向靠主場食胡，既然上仗力保不失，勢必趁地利搶攻爭勝，馬其頓球隊舒肯迪捷唔係佢哋對手，主W穩開。