史達比克散晒桑恩達有餐開
2012/07/15文:渡邊年

歐洲大陸大部分聯賽抖暑，只有北歐仲踢緊，挪超今日就有五場，部分球隊其實要踢歐霸外圍賽，其實幾疲於奔命，其中包尾大幡史達比克今季球員四散，點有能力兩邊兼顧，今仗作客桑恩達睇嚟都死得，桑恩達係最佳反彈時機。

可能你會問，上季史達比克乜都冇攞過，點解會踢歐霸外圍賽？原因係歐洲足協每年都為公平競技頭三位嘅國家，提供一個額外歐霸外圍賽席位，挪威係其中一個國家，而史達比克就成為受益者。

不過，以史達比克嘅陣容，都唔知受益定受害，因為財困搞到星散，連球場都賣埋，要用番舊球場，今季要用青年軍，再問其他球會借人先開到波，所以今季一直包尾。

踢完歐霸兵疲
上周五凌晨史達比克對芬蘭維斯屈萊踢完歐霸外圍賽次回合，連埋今晚場波，計計埋埋十一日要踢四場，史達比克梗死啦，所以今場主場嘅桑恩達幾有機會。

老老實實，桑恩達都唔係叻得去邊，自四月底至今聯賽八戰未贏過，開始跌入護級漩渦，但難得遇着史達比克，仲唔把握機會搶分等幾時。歐洲平均主W偏低，擺明有計，今場少少哋跟番注，如果咁都贏唔到，跟住全季長反桑恩達都得喇。