亨利復出紅牛有灣轉
2012/07/15

周一繼續有美職舉行，較早時間舉行有紐約紅牛主場鬥西雅圖海灣者。以近幾場成績作比較，西雅圖海灣者的確較佳，不過球隊已全身投入喺盃賽當中，未必對聯賽太過着緊。相反紐約紅牛極需要一場勝利去振奮士氣，而且有主力亨利復出，今於主場肯定會拚盡，主W必揀。

西雅圖海灣者近幾年都係美職盃盟主，故球隊亦以盃賽為最大目標，聯賽未必會太在意。尤其周中先至踢過盃賽，體力應不及紐約紅牛。要留意紐約紅牛主場特強，聯賽七次主場五勝兩和不敗，賽績上當然有利。而最重要係亨利及馬基斯等星級球員已經傷愈兼正式投入操練，今場復出對於球隊爭勝會有好大幫助。

至於侯斯頓戴拿模主場對華盛頓聯隊，同樣選擇主W。其實侯斯頓戴拿模近幾次鬥華盛頓聯隊都交出唔錯成績，再配合埋今季主場演出，相信今場可給予華盛頓聯隊頗大壓力。

科蘭登場國體會有計
最後介紹番一場巴甲國際體育會主場對山度士。前者已從意甲國際米蘭接收了烏拉圭射手科蘭，球隊攻力肯定有增無減。其實科蘭因傷患影響演出，既然身體已經處理好，相信喺巴甲會有一番作為，今場睇好主W。