莫迪「-1」炒到雲
2012/07/18文:巨高
歐聯第二圈外圍賽首回合賽事，挪超前列球隊莫迪主場對拉脫維亞球隊雲特史比斯。莫迪今季狀態長期見勇，屬今季挪超爭標球隊之一，如今喺歐聯外圍賽面對拉脫維亞弱旅雲特史比斯，相信莫迪可以輕鬆姿態擊敗對手，「讓球主勝」開出機會甚高。

莫迪今季強項就係主場，連同聯賽及挪威盃，莫迪主場賽事全數勝出，而且入球數字亦相當之高。雖然挪超水平並非歐洲一線，但今場對手雲特史比斯質素有限，莫迪可謂夠贏有凸。雲特史比斯經常喺歐聯及歐霸盃外圍賽亮相，奈何成績都係一般，就以上季為例，雲特史比斯於歐霸盃第三圈外圍賽遇到貝爾格萊德紅星，結果雲軍踢落完全唔夠班，兩回合計慘敗一比九出局。今次遇到挪超主場王莫迪，相信呢支拉脫維亞球隊都係凶多吉少。

盧多格德斯有料到
另外保加利亞球隊盧多格德斯主場對克羅地亞球隊薩格勒布戴拿模，主W可優先留意。盧多格德斯於09至10年球季仲係保加利亞丙組仔，點知佢哋好似坐火箭咁，一路升上最高級別聯賽兼贏埋冠軍。盧多格德斯潛力無限，仲有大把上升空間，相信今仗有足夠實力擊敗薩格勒布戴拿模。