國米大甩漏夏德博偷雞
2012/08/02文:巨高

歐霸盃外圍賽第三圈首回合，克羅地亞球隊夏德對意大利球隊國際米蘭。今季國際米蘭一改以往「大花筒」性格，老闆莫拉堤未有斥巨資收購大名球員。某程度上國際米蘭實力比上季下降，夏德或把握形勢及主場之利向對手搶攻。相信今場入球數字唔會太低，不妨留意大盤。

國際米蘭喺今夏掃走多名球員，較具名氣有盧斯奧、施薩索拉斯、科蘭等等，而空缺就由幾名青年軍補上。國際米蘭以一套全新體系出戰歐霸盃，當中出現兩個疑點，第一係中堅森美爾失去好拍檔盧斯奧，拍住蘭奴捷亞出戰隨時會有大量甩漏。第二係班新仔大賽經驗不足，未必可適應壓力。唯一可取係前鋒柏拉斯奧與迪亞高米列圖，兩位阿根廷人同聲同氣，近期幾場熱身賽都盡顯默契，攻力有保證。

主隊把握首回合搶攻
夏德向來都係克羅地亞強隊，而且喺○九至一○年球季由意籍老教頭里查執教過，故球隊對於意大利球隊嘅戰術編排唔會陌生。相信球隊會把握主場之利搶攻，務求喺首回合取得入球。夏德採取主動，應可帶動到國際米蘭更投入於進攻當中，開大盤好正路。