幾支爭標熱門聖日耳門、里昂、里爾今晚均會登場，不過波童覺得最有投注價值係升班球隊巴斯蒂亞，作客面對有兩大主力離隊嘅索察，「讓球客勝」固然好路，進取啲捧埋3.7倍「半場客勝」。

巴斯蒂亞對上一次於甲組角逐係喺04/05球季，不過佢哋近兩次以低組別身份於盃賽遇上索察都能淘汰對手，最近一次於上季法足盃64強大勝四比一。巴斯蒂亞今季留用大部分升班功臣，包括上季加埋入咗超過三十球嘅進攻鐵三角馬奧利達、艾阿朗素及卡斯里，相反索察去季首席射手邁加已轉投英超韋斯咸，國家隊新貴馬雲馬田則轉投里爾，中前場兩大靈魂離隊，勢必影響球隊進攻力，莫講話讓波，以佢哋防線上季失球多達六十球嘅表現，主場輸埋一啲都唔奇。巴斯蒂亞陣容變動少，相信比主隊更快入局，求好分頭可捧「半場客勝」。