國際足球熱身賽，法國於勒阿弗爾主場迎戰烏拉圭，今場係法國新領隊迪甘斯首場領軍賽事，為保球隊團結性，迪甘斯棄用了拿斯尼在內嘅四名麻煩友，但同時間亦減弱了球隊進攻瓣數，烏拉圭孖寶蘇亞雷斯、卡雲尼為備戰新球季亦冇份入選，今場最好捧細盤。

法國繼一○年南非世界盃後，今夏於歐國盃決賽周再次爆出內亂醜聞，結果最終不敵西班牙八強止步，領隊白蘭斯掛冠而去，由另一位前國家隊隊長迪甘斯接手。由於拿斯尼、文尼斯、馬維拿及賓艾化被足總視為歐國盃內訌嘅罪魁禍首，前兩人分別被罰停賽三場及一場，後兩者亦被口頭警告，迪甘斯今次決定棄用四人，反而挑選了幾名新面孔，包括皇馬小將華拉尼、圖盧茲中場伊天卡普爾、聖日耳門守將查列及蒙彼利埃後衞恩加麥比華，希望可增強球隊團結性及注入新力量。

迪甘斯咁做當然有佢道理，不過平心而論，缺少拿斯尼、文尼斯兩名進攻主力，單靠列貝利、賓施馬攻堅，法國隊入波唔係咁容易，再加上紐卡素中場卡比耶因傷落選，中場攻守聯繫亦肯定有影響。今場係迪甘斯首度擔正領軍，抱住「不求大勝、只求無過」嘅心態亦好正常，以目前人腳，實在唔好期望佢哋會有脫胎換骨嘅演出。

烏拉圭今次係為咗備戰九月份鬥哥倫比亞及厄瓜多爾嘅世界盃外圍賽，不過前鋒卡雲尼剛為拿玻里於北京踢完意大利超級盃，利物浦蘇亞雷斯亦要為本周末開鑼嘅英超作準備，兩人今仗都唔會上陣，老將科蘭近年狀態急速下滑，威脅力有限，要在法國身上取得入球亦有困難，波童建議捧入球細。