英超今晚開咧，新球季各軍變動甚多，名牌球隊阿仙奴正式進入「後尹佩斯時代」，「兵工廠」粉絲唔妥反骨仔尹佩斯，燒波衫都嫌唔夠激，仲要死亡恐嚇尹佩斯老婆，認真惡死！無論點嬲都好，「廠粉」都要面對現實，球隊失去進攻重心，開鑼戰主場對新特蘭老鼠拉龜冇碇埋手，預期兩軍入波唔多，細盤分頭唔錯，值得一試！

尹佩斯加盟阿仙奴死敵曼聯，激到全球「廠粉」生蝦咁跳，唔少人因愛成恨，有激進球迷索性一把火燒咗尹佩斯件波衫，仲將片段擺上youtube示眾，一邊燒一邊豎中指，對呢個叛徒恨之入骨！與此同時，另一批「廠粉」就喺網上發動攻勢，齊齊殺去尹佩斯老婆艾芭莉個twitter瘋狂留言，粗口橫飛，內容三級，有個哥仔玩死亡恐嚇，話希望尹佩斯成家死晒，超級惡毒！

發洩過後要向前看，領隊已選中堅華美倫做新任隊長。尹佩斯上季喺英超轟入30粒，屬隊中唯一一個聯賽士哥達到雙位數字嘅球員，新前鋒基奧特同普多斯基唔係唔叻，但一定冇尹佩斯咁叻。「兵工廠」首戰主場對新特蘭仍獲莊家睇好，主W熱至1.3倍，佢哋上季聯賽兩戰新特蘭同樣贏得辛苦，首循環主場憑尹佩斯梅開二度險勝2比1，次循環作客由亨利尾段建功又係贏2比1，依家冇亨利冇尹佩斯，贏唔贏到都成問題！

新特蘭擁有神級教頭奧尼爾，呢位仁兄慣以蔗渣價組軍，但往往可踢出燒鵝味道。「黑貓」今夏人腳變動唔多，主要執咗阿士東維拉棄將古拿，後防多個通天老倌，臨開咧簽埋前法國射手沙夏，又多個曼聯舊將。大軍後防穩，最大問題係攻力弱，上季聯賽首席士哥拿賓特拿返咗阿仙奴坐冷板，池東沅同費沙甘保產量低，另一進攻主力施斯隆季前疏操缺態，今戰惟有專心死守，預期兩隊入波唔多，捧細。