另類創富坊
2012/08/19

項目︰第一隊入球
推介︰福岡黃蜂 客隊

北九州向日葵今季十四場主場聯賽只得四勝，勝出率不足三成，今場仲要讓波梗係唔抵玩啦。不過，睇番北九州最近四場主場聯賽有三次都係先失波，而且雙方對上三次於日乙碰頭，福岡黃蜂亦係先開紀錄嘅一方，今場不妨一敲第一隊入球嘅「客隊」，有2.1倍分頭相當不俗。

項目︰單雙
推介︰特林素 雙

今晚有場挪威盃由挪超特林素於主場迎戰甲組球隊波杜基林特，驟眼睇呢場雙方強弱懸殊，主隊贏波賠率只得1.26倍非常乏味。不過，兩軍有一項數據值得留意，就係兩隊對上八場賽事有七場都係開雙，其中特林素今季主場開雙比率更高達80%，入球雙有1.8倍值得支持。

項目︰半場主客和
推介︰甘美奧半場和

巴甲球隊費古倫斯雖排於榜尾，而且近八場賽事只得1勝1和6負，但球隊「半場和」成績其實唔錯，已連續開出四場，而且費古倫斯今季所有賽事共有十一次成功開出「半場和」，加上今仗對手甘美奧今季亦出現咗八次半場未分高下嘅成績，兩軍皆有頗強數據支持，今仗「半場和」有2.35倍可以一試。

項目︰總入球
推介︰侯斯頓戴拿模2球

美職球隊侯斯頓戴拿模近期戰績唔錯，值得留意係球隊最近三場賽事無論擊敗對手還是負於對手，總入球都係2球。侯斯頓戴拿模今季已五度開出總入球2球，加上今仗對手哥倫布機員今季亦有七次開出總入球2球，兩隊都對「兩個士哥」情有獨鍾，總入球2球有3.2倍可以一敲。

項目︰波膽
推介︰沙士菲1:0

10/11年阿甲秋季冠軍沙士菲今季重拾勁旅本色，頭兩輪聯賽1勝1和兼保持不失波。拉魯斯開季雖然兩連敗，不過對手係實力不俗嘅高隆及紐維爾舊生，連續兩場僅輸0比1亦已有交代。沙士菲有主場之利可以睇高一線，但憑拉魯斯硬淨表現估計亦唔會大敗，波膽敲沙士菲勝「1:0」。

項目︰首名入球
推介︰夏薩特、林柏特

應屆歐聯冠軍車路士，於新季英超當然想打響頭炮，作客弱旅韋根，必定以三分為目標。季前社區盾車仔雖不敵曼城，但一班前鋒狀態都唔曳，其中新兵夏薩特更生猛非常。佢踢法具侵略性，而且又鍾意自己起腳，今戰有機會首開紀錄。韋根必踢守勢波，車仔或憑罰球率先入波，林柏特係車仔12碼劊子手，投注「首名入球」可以預埋佢。

項目︰大細
推介︰馬賽 大

馬賽本季有教練迪甘斯離隊，而且隊長迪亞華亦改投英超韋斯咸，不過呢班波始終有勁旅霸氣，新球季旗開得勝後，今輪於主場鬥索察，肯定打得更加進取。索察後防麻麻，開咧首場鬥巴斯蒂亞，雖先開紀錄但隨即失番三粒，最後以二比三見負；佢哋近六次去到馬賽地頭五次開大，要追。

項目︰讓球盤
推介︰波圖基沙 平手盤

巴甲球隊波圖基沙今季主場成績唔錯，聯賽八戰只輸過畀前列隊伍華斯高及高士路，連埋作客佢哋近七場聯賽同樣未輸過，狀態極佳。相反國際體育會上周中作客哥連泰斯以○比一落敗，對上三場聯賽只得一勝，而且雙方近六次對賽有五次都係由主場一方勝出，當中波圖基沙贏咗三次，主場優勢非常明顯，平手盤捧主隊。

項目︰半全場
推介︰巴黎聖日耳門　和客

聖日耳門今夏大事擴軍，視法甲冠軍為囊中物，首場聯賽和波，今輪作客阿些斯奧不容再失，預料會由頭攻到尾。今場客W熱得有理，但進取嘅應直取「和客」。阿些斯奧主場硬淨，上季最後11場主場聯賽不敗，其中9場半場打和，反映呢班波防線並非豆腐。聖日耳門季初未完全上力，就算爭勝心十足，預料都要下半場先可領先，捧「和客」啱數。