凱沙添強鋒撲殺羅托
2012/08/19文:蘇斯黑柴
Alwin係黑柴好戰友，今晚三場德國盃推介係我哋研究過嘅最終決定，我哋亦睇好凱沙羅頓同法蘭克福客Ｗ。

先講羅斯托克主場鬥凱沙羅頓，凱沙羅頓上季喺德甲包尾降班，全季只入24球係致命傷，今季佢哋決心回升德甲，亦針對弱點增兵，買入咗賓查古同艾迪素兩大射手，賓查古係瑞士國腳，早年喺紐倫堡亦取得相當卓越入球率，至於來自法蘭克福嘅艾迪素亦有豐富德甲經驗，Alwin亦話兩人喺熱身賽嘅表現相當搶鏡，相信球隊目前嘅攻擊力比上季踢德甲時更為強大。

羅斯托克今季降落德丙一樣踢唔掂，目前只係排第十位，防線尤其不濟，目前共失13球係德丙失球第二多球隊，面對凱沙新鋒線相信好難頂。

奧厄力弱難抗法福
至於奧厄主場對法蘭克福，法蘭克福以德乙入波王身份新升德甲，教練艾明費仲引入多名具分量球員，包括加拿大國腳射手奧斯恩，熱身賽大勝西甲勁旅華倫西亞4:2令人留下深刻印象。奧厄上季嘅沉悶防守踢法受到球迷批評，今季決心主攻，不過又搵唔到合適球員，至今兩戰未入過波，變成攻不銳守不穩，目前排德乙尾二，主場遇強敵難有作為。