畢爾包面臨星散點讓波？
2012/08/19文:ComboKing 
 

新一季西甲開鑼，矚目程度不比英超細，巨頭皇馬、巴塞分頭出擊，已有法達斯維「畀料」，阿King就負責研究畢爾包及馬體會兩場賽事。畢爾包上季異軍突起，陣中大牌難免跳草裙舞，搞到軍心不穩，今輪鬥貝迪斯主場都讓唔起，捧「讓球客勝」！

貝迪斯夠料保不敗
於「瘋狂教頭」比爾沙帶領下，畢爾包上季殺入歐霸決賽，雖然不敵馬體會，但依然贏盡掌聲。球會本季成功留住比帥，但陣中主力卻唔生性不斷喊走，連大舊佬前鋒洛蘭迪都想離隊，對球會影響最大。另外，中場大腦查維馬天尼斯即將轉投拜仁，球隊面臨星散危機又點踢好波？貝迪斯本季雖有辛達告魯斯借用期滿回歸曼城，但呢班波攻力極強，冇話冇邊個唔掂，今次有力保不敗，「讓球客勝」有2倍分頭值博。

另一場馬體會作客利雲特，利雲特今夏賣走前鋒干尼實力削弱，反觀馬體會留住王牌法卡奧，作客小讓平半捧上盤。荷甲阿爾克馬爾主場鬥荷華高斯，主W熱到爆「讓球主勝」有暗湧，不如穩陣啲取大盤。