曼城炒起修咸頓
2012/08/19文:蘇豪
英超富豪球會曼城衞冕第一擊主場對修咸頓，曼城保持英超跨季29場主場不敗紀錄，惡氣十足，大軍剛戰勝車路士奪取社區盾，阿根廷射手泰維斯弗到漏油，拍住阿古路極具侵略性，面對升班球隊修咸頓有望輕鬆大勝，蘇豪捧「讓球主勝」！

曼城上季能夠取得聯賽冠軍，全靠一流主場戰績，大軍聯賽主場19戰18勝1和，計同前季季尾主場10戰9勝1和，已保持跨季英超主場29場不敗，當中贏咗27場，勝出率極高！曼城上季英超主場19戰入55球失12球，入波最多，失波最少，賽績幾乎冇瑕疵。射手泰維斯季初弗到爆，修咸頓仲要應付阿古路同大衞施華等優質攻擊球員，勁惡頂！

跟手介紹升班嘅修咸頓，會方今夏高價撬走般尼前鋒積洛迪古斯，單睇紙上數據，此子仲未夠班踢英超。會方另外兩個主要收購包括右閘尼達利基尼及中場史提芬戴維斯，前者曾與曼聯扯上關係，頗具潛力，後者効力富咸時期冇乜料到，級數一般。修咸頓前線靠王牌前鋒列基林拔，另外日本箭頭李忠成亦屬一路奇兵，大家都可留意。

狂攻下捧角球大
曼城今夏保留大部分主力，主要簽下愛華頓中場魯迪維爾，中場人手充裕，即使中場巴利、守將米卡李察士及門將赫特受傷休戰，實力仍遠高於修咸頓，預期球隊會控制戰局，大勝機會甚高，「讓球主勝」穩陣。另外，今場有開特別項目，角球大細中位數為11.5個，曼城勢將圍攻對手，相信會多角球，可捧大。