車仔單箭闖韋根獻細
2012/08/19文:蘇豪
車路士進入「後杜奧巴時代」，主帥迪馬堤奧為博老細阿布歡心，新兵清一色搵晒技術型中場，將改踢悅目足球提高娛樂性。不過，大軍首戰作客「豬頭骨」韋根唔易踢，韋根主場鬥強隊慣性擺出鐵桶陣守得好穩，「車仔」難大勝，捧細！

車路士上季贏得歐聯冠軍幫老細阿布圓夢，但油王鍾意睇進攻足球，見到球隊死守爛守捧盃並未收貨，所以一再傳出想搵前巴塞隆拿主帥哥迪奧拿領軍。主帥迪馬堤奧知道老細心意，今夏放走老將杜奧巴，簽入夏薩特、奧斯卡杜斯山度士同馬高馬連等技術型中場，新季實行改變踢法，預期會有更多小組入滲。

到底車路士改踢技術型足球掂唔掂，仍然有待觀察，但大軍現時前線唔多夠人用，借走埋「小魔獸」盧卡古後，得番「王子」費蘭度托利斯一個正宗前鋒，勉強叫做仲有個史杜列治頂吓，兩條友點捱成季？「車仔」個陣打單箭頭，若然中場支援唔夠，「王子」肯定孤掌難鳴。

費托最先被換出抵玩
韋根在主帥馬天尼斯帶領下，將穩守突擊發揮到淋漓盡致！韋根新季人腳變動唔大，首戰對住車路士會繼續專心防守，有力頂住對手，預期今場入波唔多，要入球細。預計車仔都係圍攻格局，捧球角大穩陣。至於特別項目，估計費托喺冇支援下被換出機會好大，有5.5倍抵玩。