兩大班霸第一擊 C朗再鬥美斯
2012/08/19文:法達斯維
西甲今晚正式揭開戰幔，由2008至11年巴塞靠美斯的神級表現，實現西甲3連冠，期間更兩捧歐聯，完全將皇馬壓在腳下；但去季皇馬在莫連奴苦心經營，加上C朗拿度的全面爆發，終於重登西甲寶座，並宣告皇馬王朝重臨。不過巴塞當然不會讓皇馬輕易得逞，將力爭再做西甲一哥。今晚兩大班霸各自喺主場作爭標第一擊，C朗同美斯兩大球王大鬥法又再展開，真係好令人期待呀！

衞冕冠軍 頭威頭細 皇馬砌華倫 見好就收
西甲首輪焦點重頭戲，當然係衞冕冠軍嘅皇家馬德里，坐鎮巴拿貝主場迎戰華倫西亞。「銀河艦隊」季前備戰積極，但主力中鋒賓施馬仲未夠弗，其替補希古恩又帶傷歸隊，而華倫亦唔係善男信女，加上皇馬周中有西超盃對巴塞後顧之憂，點都會有所保留，今仗大細開中位數到3.5球，捧細盤穩陣。

留力西超盃唔去盡
無論實力、狀態、往績，「銀河艦隊」可謂瓣瓣秤先，季前多場熱身賽都贏到大大鑊，其中王牌射手C朗同迪馬利亞極速上力。皇馬於主場開咧戰對華倫往績唔錯，該隊上一次開咧戰輸畀「蝙蝠」已經係1954年嘅事，所以相信冇乜人會懷疑皇馬今場不能旗開得勝。

不過，斯維對皇馬會否以炒鑊甘嚟響頭炮就有啲保留，點解？首先，皇馬周中仲有場更重要的賽事——西超盃首回合對死敵巴塞，以教練莫連奴咁要威的個性，加埋佢同巴塞咁多牙齒印，呢場西超盃不容有失。因此，莫帥對華倫時排陣或會留一手，最緊要贏波攞3分就收貨。

華倫4訪皇馬全細
其次係皇馬中鋒賓施馬仍未擺脫歐國盃的低迷狀態，表現有點患得患失，而其替補希古恩於上周中對德國的熱身賽撞爆頭，預計佢今場都係先任後備。對手華倫防守一向穩健，特別作客巴拿貝會踢得更小心，近4季雖錄得1和3負，但全部開細。加上華倫有蘇爾達杜、簡拿利斯、加高等皇馬棄將，面對舊主當然要打爭氣波。既然一邊想留力，另一邊又守得，細盤值得支持。

皇馬主W值博率低
皇馬衞冕首戰主場出擊對華倫西亞，被一致睇好屬理所當然，不過大部分歐洲博彩公司主W起碼有1.2倍或以上，惟獨馬會更壓低至1.15倍，講值博率只屬一般。