拜仁群星擔掃雷
2012/08/20文:Alwin
德國盃壓軸戰獅子搏兔
德國盃第一圈壓軸戰，班霸拜仁慕尼黑作客撲擊初升德乙嘅雷根斯堡，拜仁已失落了兩屆德國盃，今季季前大事增兵，已儲備足夠彈藥三線作戰，賽前無論教練軒歷基斯或陣中球員都磨拳擦掌，今場喜遇連踢德乙都未夠級數嘅弱旅，即使輪換部分戰將亦足以大捷，Alwin推介拜仁讓二球嘅「讓球客勝」。

拜仁今季增兵不惜工本，除季前已獲史達基、丹迪、梳頓沙基利、比沙路及文迪蘇傑來投外，身價達4,000萬歐元嘅查維馬天尼斯亦即將來投，雖然呢位西班牙國腳未報到，但已對舊將卻奧斯、路爾斯古斯達禾同湯馬士梅拿響起警號，軒歷基斯喺增兵後亦表明，陣中除紐亞、拿姆、列貝利及洛賓四大巨星外，其餘球員都要為爭奪正選席位而努力。球隊剛喺德超盃擊敗宿敵多蒙特，士氣正盛，新加盟中堅丹迪上季効力慕遜加柏時曾與雷根斯堡交手，已為球隊提供情報，今場唔會輕敵。

雷根斯堡德乙都未夠班
雷根斯堡上季尾靠附加賽取得升上德乙資格，不過竟然有八成升班功臣喺今夏離隊，又冇錢買人補充，目前陣中只有門將米高荷夫曼、後衞拉恩同前鋒施巴施坦荷夫曼有德乙經驗，陣中大批小將雖然係德國籍，其實都係來自匈牙利，兵源又嚴重不足，陣中只有五名守將，五個都踢足晒開咧嘅兩場德乙聯賽，冇人替換，故此被德國傳媒睇死會回降德丙，雖然聯賽主場踢爭氣波贏過杜伊斯堡，但整體級數同表現都未夠班，Alwin相信佢哋會回降德丙，今仗若然早段落後，隨時會放棄抵抗，留力周五晚作客哈化柏林嘅聯賽硬仗。