親身見證蜂巢威力
2012/08/24文:阿Kit

德甲今季特別遲開咧，明明上兩個星期已經踢完德國超級盃，但就去到今晚先正式開鑼，真係令班德甲迷望到頸都長！力求「3連霸」嘅多蒙特，今晚對住雲達不來梅，小妹有信心教練高普唔會令球迷失望。一於支持「蜜蜂仔」敲響勝鼓，延續近3季衞冕球隊開鑼戰全勝數據！

多蒙特啱啱喺德國盃贏咗支地區球隊係意料中事，畀班球員輕舒腳頭都係好嘅。不過講番早一場嘅德超盃，多蒙特係就係輸咗畀宿敵拜仁慕尼黑，雖然佢哋上半場好似未瞓醒咁任由拜仁魚肉，但下半場已經醒番晒，回復強者本色，最終追番一粒唔使食光蛋，亦證明佢哋其實冇乜走樣！

大鑼大鼓拋窒客軍
「蜜蜂仔」今季雖然少咗香川真司同巴里奧斯，但中前場有新加盟嘅後生仔前鋒馬高列奧斯同舒希巴，大家上季已經見過佢哋兩個嘅殺傷力，加上多蒙特剛剛拒絕曼聯同車路士收購羅拔利雲度夫斯基嘅要求，中場有馬里奧葛斯繼續派牌，多蒙特攻力只係有增無減。

不來梅近幾季成績每況愈下，今個暑假的起心肝大換血，新兵合作默契有待磨練！最重要係上季單天保至尊嘅比沙路，都已經畀拜仁挖走，今季換血後成績如何，有待觀察。

小妹上年開咧日身處坐滿8萬人嘅多蒙特西法倫球場，佢哋班球迷真係超齊心，一片黃色旗海下，打氣打鑼打鼓打到連個地都震埋。

而作客班球迷就被迫要坐到山頂咁遠，仲要得幾千個位，氣勢真係輸晒！大家都知教練高普鍾意多蒙特一開波就搶錢咁搶，不來梅可能未站穩陣腳已經要失波呢！

阿Kit推介
多蒙特 讓球主勝