法蘭克福強鋒大利華
2012/08/25文:蘇斯黑柴

德甲首輪今晚踢夠七場，其中三場分不同時段直播，德迷可以過足波癮，直播賽事中黑柴認為最好路係法蘭克福主場對利華古遜，兩軍都攻優於守，捧1.75倍大盤。

兩大德乙神射手合作
法蘭克福新升班，呢支上季聯賽轟入76球嘅德乙進攻王，今夏組軍態度認真，進攻中場美亞踏入足球生涯黃金期，上季成為德乙兩位並列神射手之一，球會亦索性買埋同佢並列神射手嘅格雷特霍夫箭頭，加拿大國腳奧斯恩，單計佢兩個，上季喺德乙已經合共交出34個入球同17次助攻，今晚初升德甲主場首度攜手攻堅，威力值得期待。

法蘭克福未能獲得上季德乙冠軍，主因係防守欠穩，雖然今夏買入咗幾名守將，但仲需要時間夾，今仗防線主力迪查柏停賽，另一守將阿米迪克養傷，防線並唔齊人。

利華古遜可以夫添出擊，仲未攞正牌嘅教頭希比亞賽前揚言即使今仗作客都會踢進攻足球，力爭三分，佢哋啱啱喺德國盃大炒卡爾斯耶拿，希比亞對球員表現讚不絕口，計埋之前三場熱身賽，全部都開出大盤，預計今仗入波唔會少。

主隊被罰有限度售票
此外，值得一提嘅係法蘭克福主場森林球場原本可以容納51,500球迷，不過由於上季尾發生球迷鬧事事件，德國足總判佢哋只可以有限度售票，今仗分配畀主場球迷嘅門票只得26,500張，客軍利華球迷就分到5,000張。