熱刺未磨利照贏西布朗
2012/08/25文:山度士

今季英超開鑼日認真精彩，各隊實力接近，因此今晚熱刺坐鎮白鹿徑迎戰西布朗，度士都唔敢睇得主隊太高，一來依家仲係季初，該隊未操起，由於加入唔少新血，打法上仍需要時間磨合，難免出現戰績下滑嘅陣痛期。

其實度士幾鍾意熱刺呢隊波，球星多踢得又好睇，不過該隊亦要面對各種問題。首先，前車仔領隊保亞斯重返倫敦執教熱刺，誓要重新證明自己，並且加入了維頓漢、基菲爾施古臣等新兵，但顯然仍處於磨合期，尚未發揮出應有水準。最致命係陣中王牌莫迪歷早已萌生去意，卻遲遲未落實改投皇馬，不但影響呢位克羅地亞中場嘅作戰心態，保帥未能套現去收購其代替者，令組軍行動進一步推遲。

質素秤先吼「讓球和」
唯一利好消息，係熱刺終於買斷曼城前鋒艾迪巴約，使保帥於前線有更多選擇。西布朗上仗擊潰利物浦，贏盡掌聲，不過度士覺得係紅軍踢得更曳，同埋球證嘅紅牌及十二碼判決，改變咗比賽走勢，西軍大勝不足為據。雖然熱刺仍未夠弗，但今仗可憑質小勝一粒，不妨冷敲分頭唔錯嘅「讓球和」。