馬體會大啖吔包
2012/08/27文:法達斯維

今晚西甲壓軸好戲，由馬德里體育會主場大戰畢爾包，呢場係上屆歐霸盃決賽翻版，不過「巴斯克雄獅」畢爾包近期後防立立亂，信心盡失，加上兩大主將查維馬天尼斯同洛蘭迪有離心，今仗未必會派佢哋上陣，馬體會仲唔趁你病攞你命數得就數咩，大盤可期。

其實畢爾包保留上季大部分主力，今季理應劍指歐聯席位，點知臨開季前橫生枝節，拜仁出價達4,000萬歐元，求購畢軍中後場多面手查維馬天尼斯，搞到佢心亂如麻，仲有鋒霸洛蘭迪拒絕續約，逼會方賣走佢，兩大主力萌生去意，邊有心機踢波呀。

從上仗畀貝迪斯轟入五粒中，可見畢爾包冇咗查維馬天尼斯鎮守嘅防線猶如紙紮，「巴斯克雄獅」近七仗失咗成十五球，都咪話唔得人驚。

畢爾包兵變照喪攻
馬體會首仗逼和利雲特，表現唔曳，雖然周中要同車路士爭歐洲超級盃，但主帥施蒙尼講到明今場要全力爭勝，唔會留力。以畢爾包咁孱弱嘅後防，點頂得住馬體會王牌射手法卡奧、阿達杜倫嘅進襲呢？

當然，畢軍唔會坐以待斃，新加盟嘅前鋒阿度里斯迅速入局，有力取代洛蘭迪，配合蒙尼恩等嘅支援，加上瘋子教頭比爾沙有前冇後嘅喪攻風格，今場唔愁冇波入，大盤屬不二之選。由於兩軍以地面戰為主，預計角球唔會多，捧角球細。