另一場歐聯附加賽次回合直播賽事，希臘彭拿典奈高斯主場鬥西甲馬拉加，馬拉加今季雖然賣走不少主力，不過首回合贏二比○所見，表現仍有朝氣，彭拿典奈高斯攻力唔算銳利，想攻破馬拉加大門有難度，預計入波唔會多，捧1.65倍細盤。

馬拉加上季擴軍過度，先後用重金羅致多名球星加盟，結果搞到入不敷支，今季要賣走荷西朗頓、辛迪卡索拉以減輕財政負擔，好彩佢哋基本班底始終有一定質素，伊斯高、保拿洛迪、祖亞昆、迪米捷利斯等負責擔起前、中、後三線，此外仲有季初演出令人眼前一亮嘅喀麥隆小將奧連加，馬拉加想保住首回合領先兩球優勢應該唔太難。

彭拿典奈高斯上一圈兩回合計以五比○大勝馬瑟韋爾，全因對手實力未夠班，翻查首回合數據，彭軍無論在射門次數、控球比率都不及馬拉加，就算有主場之利都冇着數，預計實力較高嘅馬拉加可控制戰局睇定嚟食，一於捧細盤。

波童另一場心水係比利時安德列治主場鬥塞浦路斯AEL利馬素，安德列治首回合作客輸一比二，想進身分組賽許勝不許和，憑佢哋多年歐洲賽豐富經驗，主場有力收復前失，1.42倍主W固然穩陣，進取啲可捧埋2.32倍「讓球主勝」。