國家打吡繼續追大
2012/08/29文:蘇豪
西班牙超級盃首回合巴塞隆拿主場贏3比2，次回合輪到皇家馬德里主場出擊，皇馬開季3戰不勝，防線仍舊不穩，由於首回合作客僅輸3比2，有2個作客入球在手，故皇馬今仗只須小勝就可捧盃，形勢上焗攻，大把空位畀對手打反擊，危危乎！今場莊家開出平手盤實在好惡揀，但鑑於兩軍近7次對戰全部開大，盃賽場合又唔會縮番轉頭，一於繼續追「大盤」！

兩隊防線各有隱憂
皇馬聯賽首戰對華倫咬極唔入，跟手喺西超盃不敵巴塞，而且防線明顯頂唔住對手進襲，上仗西甲第2輪作客基達菲更加反勝為敗全失3分，主帥莫連奴更將球隊表現評為「不能接受」。連續3場失利後，皇馬全軍上下當然想喺死敵巴塞身上挽回面子，可惜球隊防線不穩情況短期實難有改善，中堅沙治奧拉莫斯本身唔算可靠，拍住明顯唔多夠班嘅後備中堅艾比奧爾更難予人信心。由於皇馬首回合落後，返到主場要主動搶攻平反敗局，唔擔心C朗同迪馬利亞等人入唔到波，最怕前面入埋唔後面夠輸！另一邊廂巴塞隆拿個頭開得好靚，3場正式比賽全勝兼轟入10球，球王美斯火速上力，一個人已射入5球，上場更包辦兩個士哥助球隊反勝奧沙辛拿，演出對辦，加上巴塞嘅風格係唔理乜嘢環境場合都愛打主攻，想喺巴拿貝入波絕非難事。

總入球「4」、「5」有得諗
巴塞首回合僅勝3比2，門神域陀華迪斯尾段玩波出事，搞到多失一個作客入球，優勢非常微弱，加上防線主力佩奧爾受傷休戰，要搵馬斯真蘭奴串演中堅，作客面對皇馬星級鋒線好難保清白之身。

翻查往績，近7次「國家打吡」全部開出入球大，今場相信士哥都唔會少，可先揀大盤！另外，雙方近7次有5場開出總入球「4」、「5」，兩個選項分頭同樣不俗，可以雙雙兼顧。