米達列斯-1滅模
2012/08/30文:蘇豪
歐霸盃附加賽次回合上演，上屆8強分子烏克蘭球隊米達列斯主場迎戰羅馬尼亞大軍布加勒斯特戴拿模，米達列斯實力超班，首回合成功克服攝氏40度高溫淨勝兩球，明顯高過布加勒斯特戴拿模幾班，返主場優勢更明顯，有力大炒對手昂然殺入分組賽，可捧「讓球主勝」。

米達列斯近年屬歐霸盃常客，上屆分組賽掟甩阿爾克馬爾及奧地利維也納等首名晉級，32強兩回合合計以8比1大炒奧地利名牌球隊薩爾斯堡，最終喺8強畀士砵亭淘汰，演出令人眼前一亮。米達列斯主力射手馬高迪域已轉投薩克達，但仍有阿根廷孖寶莊拿芬基斯達度及荷西蘇沙撐住，後者踢過拜仁同拿玻里，經驗豐富，近期獲國家隊徵召，絕非泛泛之輩。

今屆歐霸盃外圍賽有國際米蘭及利物浦等名牌球隊參戰，相比之下，米達列斯唔算特別起眼，大軍附加賽首回合作客布加勒斯特戴拿模面對嚴峻考驗，當日氣溫高達攝氏40度，不過，球隊最終都能以2比0勝出，質素明顯較高。計實力，呢班波若打入分組賽都屬出線熱門分子，布加勒斯特戴拿模級數輸蝕，仲要作客焗攻，形勢相當惡劣，今仗大敗機會甚高。

利雲特炒起馬瑟韋爾
同日西甲球隊利雲特主場對蘇超大軍馬瑟韋爾，首回合利雲特作客都贏兩粒，兩地足球水平差距太大，西甲求其搵隊弱旅都可砌低蘇超班霸些路迪，更何況利雲特並非弱旅，今場對手馬瑟韋爾只屬蘇超中型班，根本冇得揮，預期利雲特可大勝，要「讓球主勝」。