拉科同基達菲鬥猛火
2012/09/01文:法達斯維
今晚西甲雖然冇皇馬、巴塞，但有「超級拉科」壓陣，拉科魯尼亞坐鎮主場迎戰基達菲。兩軍近況都好弗，後者上輪更爆冷反勝皇馬，呢場要估邊隊贏波，確實幾蝦人，既然大家火力都唔曳，不妨追大盤。

法達斯維季初對重返甲組的拉科都唔太睇好，因為陣中老的太老、嫩的太嫩，依家仲要靠「玻璃人」老將華拿朗組織進攻，幾名葡萄牙新仔未知是龍是蟲，好在新加盟的阿古拿同碧斯有料到，其中有阿古拿助陣中場，幫輕了華拿朗之餘，他的後上入楔埋門都冇生疏，上仗連省兩粒逼和華倫，證明其豐富經驗，有助呢支青黃不接球隊的重建工作。

基達菲贏完皇馬心雄
基達菲今季雖流失多名主力，但並冇失去鬥心，上仗於主場更反勝「銀河艦隊」皇馬，踢出代表作，尤其是後備入替的阿祖安哥倫加，呢位靈活型前鋒，頻頻以速度爆破對方的防線，搞到西班牙國腳後衛艾比奧爾大出洋相，配合米古、拿菲達、巴拉達的支援，加埋今仗復出的柏度李安，基達菲的反擊不容忽視。既然兩軍均打起信心，士氣正盛，預計會合演一場入球騷，大盤屬不二之選。