曼城大掃貨 開定水喉血拼昆士柏
2012/09/01文:蘇豪
英超王者曼城今晚主場撲擊昆士柏流浪，兩隊上季煞科日合演經典戰役，曼城主場驚濤駭浪險勝3比2奪冠，自此有鋪反勝癮，喺社區盾及開咧戰同樣反勝3比2，上場鬥利物浦尾段2比2逼和對手，連續3場波都失兩球，防線鬆散未必贏到兩粒，「讓球主勝」唔算穩。為加強衞冕力度，曼城於轉會窗關閉前大舉掃貨，今場預期都會多入波，大細中位數調整至3.5球，一於玩鋪大！

曼城上季煞科戰主場對昆士柏流浪，滿以為可以依絲Ｗ捧盃，殊不知戰至補時先憑迪斯高入波扳平，再喺完場前由阿古路射入奠勝士哥，過程峰迴路轉，食盡驚風散先保住熱Ｗ！

曼城能夠捧盃，除咗要讚班球員永不放棄，仲要多謝昆士柏流浪教頭曉士尾段冇落柯打叫球員拖延時間，兩隊合演英超史上其中一場經典戰役，今次碰頭預期唔會咁激，但仍然有睇頭。

曼城有鋪反勝癮
今戰強弱懸殊，曼城勢將控制戰局，但戰況唔會悶，佢哋自上季煞科戰驚險奪冠後鍾意咗呢種贏波方式，新季先喺社區盾反勝車路士，開咧戰主場對修咸頓踢到80分鐘由拿斯尼士哥贏3比2，上次對利物浦踢到尾段憑泰維斯建功扳平，場場末段都有嘢發生，今戰即使續有王牌前鋒阿古路養傷，前線有泰維斯、巴洛迪利同迪斯高供主帥文仙尼調配，仍有條件連番數胡。

昆士柏流浪季前大事擴軍，點知首戰喺主場畀史雲斯狂數，主帥曉士決定買到掂為止，近期再簽下國際米蘭門神施薩索拉斯及皇馬中場格尼路。QPR中前場有朴智星、泰拉拔及森莫亞等人在陣，有力再射死曼城門神赫特，三線之中以後防最弱，兩閘保辛華同法比奧達施華攻強守弱，球隊上季兩戰曼城都輸2比3，今戰好有機會歷史重演，捧大最好！