拉掃次貨無力還卡數
2012/09/02文:美斯謙
英超今晚除兩場大戰外，仲有場紐卡素對阿士東維拉。兩軍狀態可說差天共地，紐卡素聯賽已開齋，上仗不敵車路士但表現不算太差；反而維拉開季聯賽兩連敗，球隊就算急忙增兵亦未必能解決問題，作客紐卡素形勢兇險，相信難逃再敗，捧「喜鵲」全取三分。

紐卡素剛於上周中踢完歐霸盃附加賽次回合賽事，但球隊只有四名主力於該仗上陣。

紐卡素歐霸留力
「喜鵲」以大部分副選球員出戰歐洲賽，明顯較重視英超賽事，球隊上仗聯賽不敵車路士屬非戰之罪，今仗只要踢出開鑼戰擊敗熱刺的水準，加上主力卡比耶及柏比斯施斯等養精蓄銳復出，要擊敗維拉絕非難事。

維拉剛於英聯盃打開今季勝利之門，但球隊飽受傷兵困擾，主力如李察鄧尼等有傷未能上陣，就算於轉會窗關閉前接連掃貨，但球員質素大多平庸，不可能即時救到火。維拉主帥林拔相信要花頗多時間才能執掂球隊，今仗仍未係時候攞到分，一於捧主隊紐卡素贏波。