朗斯夠韌殺得起昂熱
2012/09/03文:ComboKing

今晚賽事唔多，阿King對法乙的朗斯主場對昂熱最感興趣，朗斯雖然經常和波，但開咧五仗未輸過，勁有韌力，今仗能藉主場之利擊敗傷兵滿營嘅昂熱，主勝要捧。

朗斯開咧五仗聯賽一勝四和，但該隊表現持續進步，其中有新兵杜卡斯來投後，為前線增添不少生氣。

相反，昂熱今仗有古杜亞同柏沙利因傷缺陣，而上季助攻王迪亞高高美斯、蘇古利亞、約歷拉維亦有傷上陣成疑，殘陣應戰見到都唔開胃，特別係冇咗迪亞高高美斯呢位策劃者，大大影響昂熱攻力，作客無力搶分，捧番主勝好過。

柏林打吡撐哈化
另外德乙有場「柏林打吡」，由柏林聯主場對哈化柏林，主隊開季至今未贏過，今仗又有主力舒漢希美未必能披甲，而哈化柏林上仗成功開齋，士氣如虹，面對同市死敵唔會腳軟，客勝值博。最後阿甲基爾梅斯近況大勇，尤其喺自己地頭，近六仗贏足五仗，今仗以強陣出擊，對住作客曳到爆、經常於尾段跌Watt嘅小阿根廷人，主勝實食冇黐牙。