馬其頓有機可乘
2012/09/07文:Louis
Louis首次同大家見面，第一炮講吓今晚克羅地亞主場對馬其頓，呢場波我撐番祖家馬其頓，但要強調唔係「粉絲推介」，我認為兩軍目前實力同狀態嘅差距絕對冇賠率顯示相差咁遠，克羅地亞主W得1.15倍太過分，馬其頓「讓球客勝」有4.1倍好分頭值得一敲。

世界盃外圍賽歐洲區A組喺Louis眼中好激，所有六支隊伍比利時、克羅地亞、馬其頓、蘇格蘭、塞爾維亞同威爾斯，除咗實力接近外，演出水準同樣咁飄忽，預期會有大量意想不到賽果，今仗克羅地亞主場對馬其頓牌面雖較高，但球隊喺歐國盃後換帥，深受愛戴嘅領隊比歷離職，由欠缺資歷嘅史迪馬取代，克羅地亞喺歐國盃小組出局卻受到好評，但呢個史迪馬當時任電視台評述員，不斷批評比歷保守，最終足總竟然信佢由佢接手，令全國嘩然，佢點兵真係亂咁嚟，竟然一口氣選咗七個前鋒，上月中對瑞士嘅熱身賽瘋狂咁排出二四四陣式，最終主場輸2比4，瑞士全場仲錯失三、四次必入良機，克羅地亞演出差到冇眼睇，Louis相信史迪馬好難喺短期內執掂隊波，一般估計佢帶隊幾場就會被炒。

馬其頓防線進步大
至於馬其頓亦由新帥贊歷華斯基領軍，但呢個前布魯日教練就令人放心得多，佢點兵工作令人信服，同時令球隊防線表現大有進步，近三場熱身賽都冇失波，包括作客對勁旅葡萄牙，何況馬其頓喺對克羅地亞往績唔輸蝕好多，近六次對賽一勝二和三負，三場敗仗都係一球僅敗，結合目前情況，我哋嘅狀態同士氣比克羅地亞好得多，今場作客都有力搶分。

Louis 推介：
冰島大 ★★★★

荷蘭大 ★★★

馬其頓讓球勝 ★★

Louis
Peter Bogdanovski

國籍：馬其頓

32歲，酒吧東主，半職業球評人，有10年經驗，於足球博彩資訊網站bettingadvice寫球評，曾獲1次全年總冠軍及2次亞軍，對多個聯賽包括英超、西甲、德甲都有研究，對其祖家馬其頓的國際賽亦有心得，擅長發掘有好分頭冷門。