加拿大巴拿馬 強細對決
2012/09/07文:波童法寶

世界盃中北美洲區外圍賽，兩大熱門美國、墨西哥於A、B組分途出擊，不過波童今輪重點推介係C組加拿大主場對巴拿馬，兩軍頭兩輪分組賽展現極強防守力，而按照目前形勢兩隊大有機會攜手出線，相信彼此都唔想輸畀對方失先機，預計今場入波唔會多，建議捧入球細。

中北美洲區外圍賽目前踢到第3階段，12支球隊分3組，每組首、次名出線，巴拿馬及加拿大身處C組，同組仲有上屆決賽周分子洪都拉斯同古巴，不過，洪都拉斯今屆表現令人失望，頭兩輪分組賽都贏唔到，相反今場主角加拿大、巴拿馬兩戰保持不敗，而且同樣保持0失球，如以中位數2.5球計，此組至今踢咗4場分組賽全部開細，預計今次都係一場少入波賽事。

美國入球能力減
另A組美國作客鬥牙買加，美國前鋒當路雲因傷關係未有入選，另一進攻主力丹普西亦因為轉會問題，季初上陣機會不多，狀態未十足，料對美國攻力有影響，客軍可勝不穩，寧改捧細盤。

至於B組重頭戲墨西哥作客鬥同組最強對手哥斯達黎加，哥斯達黎加一對前鋒沙保里奧、祖爾甘保包辦球隊頭兩仗6個入球，墨西哥攻力亦有番咁上下，捧入球大最啱數。