阿根廷不勝無「圭」
2012/09/07文:Mic少
世界盃外圍賽南美洲區重頭戲阿根廷主場鬥巴拉圭，主隊球王美斯成功擺脫國際賽腳軟嘅毛病，今屆外圍賽5戰已有3球進帳，而且拍檔希古恩狀態弗爆，阿古路亦已傷愈可以披甲，呢條豪華「三叉戟」鋒線令任何對手聞風喪膽，巴拉圭實難以招架，直取「讓球主勝」。

巴拉圭防線唔穩陣
美斯喺國家隊入波產量一直唔及球會，但自從沙貝拉執教阿根廷，並委任美斯做隊長後，佢喺國際賽嘅演出愈來愈好，今屆5場外圍賽有3場取得入球。最重要係美斯往往可以憑個人之力，牽制對手多位守將，令隊友有更多進攻空間，造就希古恩喺今屆外圍賽已射入4球。

另阿根廷收到好消息，曼城射手阿古路已傷愈，令鋒線人腳更完整，呢條「三叉戟」鋒線上仗外圍賽各建一功，助球隊大勝厄瓜多爾4比0。阿根廷中前場咁多數胡人物，令對手防不勝防。巴拉圭目前5戰1勝1和3負，過往穩健防線已蕩然無存，5場波全都有失波，而且3場作客都淨輸2球，今次到訪阿根廷，實在凶多吉少。

哥倫比亞主場「大」晒
另一場外圍賽，哥倫比亞主場對烏拉圭亦值得留意，因為雙方都有超級射手助陣，哥倫比亞前鋒法卡奧早前於歐超盃，上半場已3次射破車路士大門，非常犀利。

烏拉圭前鋒蘇亞雷斯今屆外圍賽已有6球進帳，排射手榜第1位，加上有卡雲尼及科蘭，雙方都火力十足，對攻下當然捧入球大！