英軍「細」途險惡
2012/09/07文:蘇豪
2014年世界盃歐洲區外圍賽今晚開打，英格蘭在H組首戰作客弱旅摩爾多瓦，兩國世界排名相距超過130位，牌面冇得揮，但英軍缺少朗尼及安祖卡路爾，前線冇晒可靠「士哥拿」，欠缺強攻大勝本錢。摩爾多瓦專心死守有力減少失球，預期入波少，捧細！

朗尼卡路爾缺陣
英格蘭由鶴臣帶領出戰歐國盃，喺備受睇淡情況下殺入八強，最終對意大利射輸十二碼出局，英軍向來都雷聲大、雨點小，鶴臣臨危受命領軍，呢個成績已經叫做有交代o架喇！喺呢位老帥領軍下，英格蘭踢落更實際，冇乜花巧嘢，進攻傾向單調，對強隊專心守住打反擊都有啲作為，不過要佢哋打陣地戰強攻對手，似乎有啲難度喎！

英格蘭於世盃外首度出擊，當然想砌低摩爾多瓦攞頭威，但今戰缺少王牌前鋒朗尼，冇埋呢個星級球員喺前面造波，創造力進一步受削。好喇，想話簡簡單單搵安祖卡路爾擔正頂死對手，點知呢個大舊佬傷埋，現時前線三子韋碧克、迪科爾同史杜列治都非可靠士哥拿，唔通又要靠謝拉特咩！左閘艾殊利高爾受傷休戰，但影響相對冇咁大。

摩爾多瓦守得吓
摩爾多瓦世界排名141位，足足低過英格蘭超過130位有多，單睇排名根本冇得打，如果賭波有咁簡單就好喇！摩爾多瓦之前於歐國盃外圍賽主客兩戰荷蘭同樣僅輸○比一，表現絕對唔失禮！摩軍守將柏古拿古表明會瞓身死守，希望同英軍互交白卷，以英軍前線人腳，今戰隨時老鼠拉龜，玩細好過W！