賓福特主場睇高一線
2012/09/08文:ComboKing
周六晚如期有英甲進行，首先研究賓福特主場對高車士打。賓福特聯賽成績唔算標青，但因今場對手高車士打較為弱勢，加上有主場之利幫助，相信賓福特有力爭取到聯賽第二場勝利，主W開出機會極高。

賓福特今季只踢過兩次主場比賽，其中一場輸畀前列球隊伊奧維，需知後者開季當弗，賓福特失分都可以理解。但對住中游分子克魯就即刻露真身，大炒對手五比一。查實賓福特識得留放，絕對唔會浪費氣力打冇把握嘅仗。今次對手只係弱勢球隊高車士打，相信又係賓福特「起筷」好時機，主W應該冇走雞。

海灣者回勇搵芝華士出氣
另外美職方面，西雅圖海灣者主場對美國芝華士。西岸球隊西雅圖海灣者之前全心踢美聯盃，點知喺決賽不敵肯薩斯體育會，搞到西雅圖海灣者士氣有少少回落。而見近期幾場比賽已經回復正常水準，今輪聯賽應有力爭勝。美國芝華士踏入八月就一沉不起，剛賽對聖荷西地震仲吞四蛋，今次形勢不樂觀，捧「讓球主勝」！

最後要留意葡聯盃，其中歷索斯主場對塞圖巴爾，葡萄牙球隊普遍入球能力唔算高，盃賽場合亦唔會去到盡，細盤開出機會較高。